Prinzessin Bellabel a de Street Parade

Us eme Lächli git's es Bächli.

S Pony vo de Prinzessin Bellabel isch verletzt. Das isch ganz blöd gloffe!

Prinzessin Bellabel isch nämlich mit em Pony z Züri gsi, uf em Üetliberg, und hät i d Stadt abe glueget, zur Street Parade. Das isch es riesigs Fäscht im Summer i de Stadt, wo uh vill Mensche chömed go spaziere, ässe und uf de Strass tanzä. Überall hät's Musig, meistens luut, und alli hend's guet mitenand. Es isch amel e grosses Gwusel. Aber will alli so fröhlich sind, passeds mengmal gar nüme so uuf. Und so isch us eme Lächli wiederemal es Bächli worde:

Es isch en uh heisse Summertag gsi. Uf de teerete Strasse zwüsched de Hüüser isch es gsi wie imene Ofe, und am See isch es grad au nöd vill besser gsi. D Mensche hend lustigi Hüet aaglait oder sich nassi Tüecher um de Hals gwicklet. Es paar sind fascht blutt umeglaufe, und anderi hend probiert, ganz vill Chleider aazlege, damit d Hitz nöd bis a ihri Huut chunnt. Beides hät nöd vill gnützt. – Jedefalls, wenn's so heiss isch, muemmer ja immer vill trinke. Wasser, Iistee oder so, damit de Körper nöd uuströchnet.

Genau das hät e jungi Frau nöd gmacht. Sie hät vor luuter fäschte und fiire vergässe, vill z trinke, und denn isch es ihre trümlig worde. I ihrem Chopf isch plötzlich alles rundume gange, sie hät Mensche, Musig und Hüüser alles durenand gseh, und denn isch sie ganz langsam abgsacket, eifach abe uf de Bode.

Prinzessin Bellabel und s Pony uf em Üetliberg hend das gseh. Sie hend nämlich es Fernrohr debii gha, damit sie alles chönd gseh, was a de Street Parade lauft. Wo sie hüt am Morge ufgstande sind – d Prinzessin Bellabel us ihrem Prinzessinne-Bett und s Pony vo sim Strohlager – hend sie scho halbe dänkt, dass es hüt villicht en strenge Tag git mit dem grosse Fäscht. – Jetzt hend sie also gseh, wie die Frau eifach so uf de Bode gfalle isch. – Da bruucht's üs, sofort, hend beidi grad gwüsst.

S Pony hät sich ruhig häregstellt, Prinzessin Bellabel hät sich uf sin Rugge gschwunge, und sie sind imene Affezah alli Kurve vom Üetliberg abe galoppiert, bi Orange über d'Ample, über alli Fuessgängerstreife, dur sWasser vom Schanzegrabe zum Bellevue. Dött nämlich isch die jungi Frau gläge.

Prinzessin Bellabel hät ihre sofort Wasser zum Trinke gäh und ruhig mit ihre gredt. Sie hät gseit, sie heissi Laura, die jungi Frau. D Prinzessin Bellabel hät sie uf es Bänkli wölle lege. Aber damit sie das hät chönne mache, hät s Pony zerscht müesse die andere Lüüt wägschubse – es hät ja nöd eifach fründlich chönne säge: «Platz mache, bitte.» Also hät s Pony mit sine fiine Nüstere – das isch dött ganz vorne am Chopf vom Pony, wo die grosse Naselöcher sind – de zwei Manne und vier Fraue uf em Bänkli es Schüpfli gäh, und die sind vor Schreck grad ufgumpet. Es hät nämlich suscht kei so grossi Tier a de Street Parade – höchstens mal es Hündli.

Jetzt isch also d Laura uf em Bänkli langsam wieder zu sich cho, dank em Trinke, und isch wieder ellei zrächt cho. Denn hät Prinzessin Bellabel s Pony am Halfter gnoh und süüferli us de grosse Menschemengi usegführt. Sie hend glächlet, will sie wieder emal richtig hend chönne hälfe, Prinzessin Bellabel und s Pony.

Aber denn – denn hät's au no fürs Pony us eme Lächli es Bächli gäh:

Grad no am Rand vo de Street Parade isch es uf e Glasscherbe gstande. Vo dene hät's nämlich a somene Fäscht ganz vill, will vill Lüüt ihri Glasfläsche eifach furtwärfed. Jetzt isch also em Pony sin lingge hindere Fuess verletzt. D Prinzessin Bellabel mues denn Salbi und Chrüter druf tue, wenn sie wieder dihei sind. Sie nimmt Ringelbluemesalbi – sie heisst au Calendulasalbi – und hilft, dass Wunde schnäll verheiled.

Aber Prinzessin Bellabel isch truurig, will s Pony Schmerze hät. Und s Pony macht sich Sorge, will's jetzt de Prinzessin Bellabel es paar Täg lang nüme chan hälfe.

Aber – s Pony hät au scho en Idee. Es hät nämlich en Fründ, wo es chönnt verträtte. Aber das isch en anderi Gschicht.

Die Gschicht isch im Omami ihrem Ostschwyzer Chrüsimüsi-Dialekt verzellt, s’erstmal am 12. August 2026 z’Ossinge.